ព្រះសីហនុ៖ បុរសជនជាតិចិនម្នាក់បានបង្ហោះវីដេអូសកម្មភាពហ្វូងត្រីដូហ្វីនជាច្រើនក្បាលហែលផុសឡើងនៅលើផ្ទៃសមុទ្រកោះរ៉ុង ខេត្តព្រះសីហនុ។ វីដេអូនៃការរកឃើញត្រីដូហ្វីននោះ ត្រូវបានបង្ហោះនៅក្នុងគណនីហ្វេសប៊ុកឈ្មោះជាភាសាចិន Liuxiaoqiang និងតាមTik Tok ឈ្មោះថា @Koh Rong driving។

ខណៈបុរសជនជាតិចិននោះបានជិះកប៉ាល់នៅសមុទ្រកោះរ៉ុង បុរសរូបនោះបានថតជាប់ហ្វូងត្រីដូហ្វីនកំពុងតែលោតបង្ហាញខ្លួន។ ក្នុងវីដេអូ បុរសជនជាតិចិននោះបានបង្ហាញអារម្មណ៍រំភើបសប្បាយរីករាយនៅពេលប្រទះឃើញហ្វូងត្រីដូហ្វីនហែក្រោមកាប៉ាល់ខ្លួន រួចក៏បានលោតចូលក្នុងសមុទ្រហែទៅជិតត្រីទាំងនោះ។

បុរសជនជាតិចិនរូបនោះបានបញ្ជាក់ថាខ្លួនមករស់នៅលើកោះរ៉ុងនេះអស់រយៈពេល៣ឆ្នាំ ហើយក៏បានជួបប្រទះនូវសត្វត្រីដូហ្វីននេះជាច្រើនលើកមកហើយផងដែរ។

លោកបាននិយាយដូច្នេះថា៖ «ខ្ញុំបានជួបត្រីដូហ្វីនជាច្រើនដងហើយ ឃើញអ្នកទាំងអស់គ្នាចូលចិត្ត។ ដូច្នេះខ្ញុំចែករំលែកទៅកាន់អ្នកទាំងអស់គ្នា។ ខ្ញុំសង្ឃឹមថាយើងអាចការពារបរិស្ថានទាំងអស់គ្នាដើម្បីឱ្យសត្វប្រភេទនេះមានវត្តមានរស់នៅក្នុងមហាសមុទ្រដ៏ស្រស់បំព្រងនៃកម្ពុជាកាន់តែច្រើន»។

ក្រោយពីជនជាតិចិនបង្ហោះវីដេអូនោះភ្លាម មានមហាជនជាច្រើនក៏បានរីករាយនឹងឃើញត្រីដ៏កម្រនេះមានវត្តមាននៅក្នុងដែនសមុទ្រកម្ពុជា។

អភិបាលក្រុងកោះរ៉ុង លោក នួន ប៊ុលថុល បានបញ្ជាក់ថា កន្លងមកលោក និងភ្ញៀវទេសចរមួយចំនួនក៏ធ្លាប់បានប្រទះឃើញហ្វូងត្រីដូហ្វីននេះនៅក្នុងសមុទ្រកម្ពុជាផងដែរ។

លោកបានថ្លែងថា៖ «ជាការពិតដែលកម្ពុជាមានវត្តមានត្រីដូហ្វីននេះនៅសមុទ្រកម្ពុជា។ ខ្ញុំធ្លាប់ឃើញវាច្រើនដងដែរ តែឃើញជាត្រីដូហ្វីនតូចៗ»។

លោកអភិបាលក្រុងកោះរ៉ុងបានប្រាប់ឱ្យដឹងថា សត្វត្រីដូហ្វីននេះ កម្រនឹងបានឃើញវាណាស់។ បើតាមលោក នួន ប៊ុលថុល ត្រីប្រភេទនេះ វាបង្ហាញខ្លួននៅកណ្តាលសមុទ្រទឹកជ្រៅ។

លោកបានបន្តថា អាជ្ញាធរក៏ធ្លាប់បានអំពាវនាវឱ្យពលរដ្ឋដែលជាអ្នកនេសាទ និងភ្ញៀវទេសចរកុំប៉ះពាល់ និងចាប់វា ពោលគឺត្រូវរួមគ្នាថែរក្សា និងអភិរក្សត្រីដ៏កម្រមួយនេះ ខណៈកន្លងមកត្រីប្រភេទនេះត្រូវបានជាប់ម៉ងរបស់អ្នកនេសាទ៕